Ambasadori italian në Shqipëri ishte sot në Korçë ku zhvilloi një takim me drejtues të Universitetit. Me këtë rast, ambasadori Fabrizio Bucci pranoi të komentojë zhvillimet në Ukrainë si edhe qëndrimin e BE, vecanërisht në Ballkanin Perëndimor.
Pasi dënoi ofensivën ruse në Ukrainë, ai u shpreh qartazi se e ardhmja e Ballkanit nuk mund të jetë ndryshe, përveç se një e ardhme europiane.
“Qasja ndaj Europës ndaj Ballkanit Perëndimor nuk ndryshon, e ardhmja e Ballkanit Perëndimor është një e ardhme europiane dhe Shqipëria shpresoj të ketë këtë vit një afrim me integrimin në BE. Ne dënojmë situatën që është duke u zhvilluar, e ardhmja e Ballkanit është një e ardhme Europiane.”- u shpreh ai.
Ndër të tjera ambasadori italian theksoi se kjo situatë tregon edhe më tepër se sa e nevojshme është që Europa të lejojë dhe të pranojë një shtrirje më të gjerë në vendet e Ballkanit.
“Italia ka qënë gjithnjë në rresht të parë për të mbështetur anëtarësimin e shteteve të Ballkanit në Europë. Kjo situatë tregon edhe më tepër se sa e nevojshme është që Europa të lejojë dhe të pranojë një shtrirje më të gjerë në vendet e Ballkanit.”, tha ambasadori Bucci.