Rruga Korçë-Dardhë ishte e bllokuar nga pushuesit këtë fundjavë. Ky është lajmi për të treguar fluksin e lartë të vizitorëve drejt Korçës e si rrjedhim në fshatin turistik të Dardhës.
Bllokimi i rrugës nga mjetet në aksin rrugor Korçë-Dardhë nuk është ndonjë e papritur. Me apo pa rreshje dëbore në fundviti dhe festat që priten nga njerëzit, kjo rrugë e ka gati të pashmangshme ndonjë problematikë të vogël në qarkullimin e mjeteve. Edhe për faktin se rikonstruksioni i përsëritur i rrugës dhe paratë e shumta që hidhen për të, nuk kanë bërë të mundur lëvizje deri diku normale në dy kahe apo me një gjerësi me standarte të pranueshme për një rrugë të trajtuar dhe financuar si aks nacional. Të paktën si aksi Korçë-Voskopojë.
Dardha tregoi as më shumë dhe as më pak se ishte destinacion i preferuar turistik në këtë ndërrim dhe fillim vitesh. Ashtu si Korça, që për hir të së vërtetës u gjallërua nga pushuesit e shumtë në këtë kohë pandemie.
Ka të dhëna nga burime të shërbimeve hotelerike se Korça me rrethinat e saj turistike si Dardha, Voskopoja etj, kanë patur prenotime mjaftueshëm të kënaqshme në pjesën më të madhe të hoteleve deri në datën 4 janar.
Edhe pa rreshje dëbore në qytet dhe të pakta në zonat e saj të larta malore këtë fundviti, Korça ja doli të rikthejë pushuesit. Dhe rruga e bllokuar nga mjetet në qarkullim drejt Dardhës, vetiu është si një reklamë e mirë e këtij fluksi pushuesish.