Korfuzi kërkon që të marrë ujin e Syrit të Kaltër. Kryetari i Bashkisë së Korfuzit të Veriut, George Machimaris, ka ngritur çështjen e transferimit të ujit nga Shqipëria për të përballuar mungesën e pritshme të ujit në dekadat e ardhshme në ishullin e Korfuzit. Lajmi është publikuar në portalin grek “ERT NEWS”, dhe flet për një marrëveshje me vendin tonë për transferimin e burimit të Syrit të kaltër drejt Greqisë.
Deputetja demokrate Ina Zhupa akuzon qeverinë Rama për papërgjegjshmëri dhe çmenduri, në një kohë që Saranda, Delvina dhe qytetet e tjera vuajnë nga mungesa e ujit të pijshëm.
“Të transferojnë ujin e burimit nëntokësor të Syrit të Kaltër në Greqi, kjo mund të jetë papërgjegjshmëria dhe çmenduria e radhës e Qeverisë Rama! Syri i Kaltër është park natyror dhe ka statusin zonë e mbrojtur nga viti 2002.
Punimet, tubacionet, ndërhyrjet do të ishin kategorisht të ndaluara dhe në dëm të kësaj pasurie kulturore. Saranda, Delvina, qytetet e tjera vuajnë nga mungesa e ujit të pijshëm, por s’ka shkuar kurrë ndërmend një ndërhyrje e tillë e paligjshme në Syrin e Kaltër. Si mund të mendohej që kjo ndërhyrje e paligjshme të bëhej për të furnizuar Greqinë?!”, shprehet Zhupa.