Një djalosh i ri shqiptar është shpallur heroi i ditëve të sotme në Itali, pasi ndihmon të infektuarit me Koronavirus në një hotel në Allasio që është kthyer në karantinë.
I riu u shërben të moshuarve që ndodhen në këtë hotel të shpallur pozitivë me Koronavirus. Në fillim ishte kreu i Rajonit të Ligurias, Giovanni Toti, ai i cili e falenderoi publikisht shqiptarin dhe i kushtoi edhe një dedikim në Facebook, ku i premtonte se do ta ndihmojë të marrë nënshtetësinë italiane.
Sot Albi ka qenë në një lidhje “Skype” me moderatorët e emisionit “Ditë e Re” në TV Ora ku foli më gjatë për eksperiencën e tij në këtë karantinë.
Ai u shpreh se në fillim ishte tmerruese kur i thanë se nuk mund të dalë askush nga hoteli, më pas mendoi t’u vinte në ndihmë të moshuarve bashkë me vëllain e tij që punon aty.
Albi theksoi se herën e parë që u testua rezultoi negativ nga Koronavirusi dhe gjithçka ka të bëjë me imunitetin e fortë të një personi.