Në seancën e Kuvendit të Kosovës është miratuar Ligji për Buxhetin 2024 me 63 vota.
Në momentin që ligji u votua, në seancë nuk ishte i pranishëm asnjë deputet i opozitës, ndërsa asnjë nga amendamentet e propozuar nga deputetët opozitar nuk mori përkrahjen e shumicës.
Buxheti për vitin e ardhshëm do të jetë 3.3 miliardë euro, apo 100 milion euro më shumë se vitin aktual.
Kryeministri, Albin Kurti me anë të një postimi në “Facebook” ka falënderuar deputetët për voton dhe është shprehur se me këtë buxhet do të forcohet mbrojtja e Kosovës, rritet sigurie dhe nxitet punësimi.
“Me këtë buxhet të përgjithshëm prej mbi 3.3 miliardë euro, që është për 35% më i lartë se buxheti që gjetëm në vitin tonë të parë të qeverisjes, po vazhdojmë që ta forcojmë mbrojtjen e Republikës, rrisim sigurinë, nxisim punësimin në tregun e punës, shtojmë kujdesin për familjet, mbështesim reformat që kemi filluar dhe mundësojmë zhvillimin e mëtejmë ekonomik dhe ngrisim mirëqenien e qytetarëve në vend”, ka shkruar ai në Facebook.