Mbledhja e Këshillit Gjyqësor të Kosovës ka dështuar të mbahet për shkak të mungesës së kuorumit, duke lënë pa u shqyrtuar dorëheqjet e gjyqtarëve të komunitetit serb, të dorëzuara që në vitin 2022.
Tre anëtarë bojkotuan mbledhjen për shkak të mospajtimeve lidhur me rendin e ditës, duke argumentuar se shqyrtimi i dorëheqjeve duhej të ishte pika e parë e diskutimit. Si pasojë, mbledhja u mbyll pa u zhvilluar.
Çështja është rikthyer në vëmendje pas kërkesës së ushtrueses së detyrës së presidentes, Albulena Haxhiu, që KGjK të marrë një vendim përfundimtar mbi dorëheqjet. Më herët, ajo liroi nga detyra shtatë prokurorë serbë, pasi Këshilli Prokurorial refuzoi të pranonte dorëheqjet e tyre.
Haxhiu deklaroi se disa prej gjyqtarëve dhe prokurorëve serbë kanë marrë paga nga Serbia edhe gjatë kohës që ushtronin detyrën në institucionet e Kosovës, ndërsa kritikoi partnerët ndërkombëtarë që kundërshtuan vendimin e saj.
Edhe kryeministri në detyrë, Albin Kurti, u shpreh se rikthimi në detyrë i zyrtarëve serbë që dhanë dorëheqjen në vitin 2022 nuk është i mundur, pasi sipas tij do të binte në kundërshtim me Kushtetutën dhe ligjet e Kosovës.
Dorëheqjet e zyrtarëve serbë u paraqitën në vitin 2022, në kuadër të largimit kolektiv të përfaqësuesve të komunitetit serb nga institucionet e Kosovës, ndërsa deri më tani vetëm Policia e Kosovës i ka pranuar zyrtarisht ato.