Këtë të enjte, liderët e 27 vendeve anëtare të Bashkimit Evropian dhe të 20 vendeve të tjera evropiane do të mblidhen në Kishiniev të Moldavisë në samitin e dytë të Komunitetit Politik Europian për të diskutuar një varg çështjesh që shqetësojnë kontinentin, mes të cilave edhe tensionet në veri të Kosovës.
Shefi i politikës së jashtme të BE, Josep Borrell pritet të takohet me presidentin e Serbisë, Aleksandar Vuçiç, teksa një tjetër takim mendohet të jetë ai mes Macron dhe Vjosa Osmanit.
Një ditë më parë, Borrell takoi në Bratislavë kryeministrin e Kosovës, Albin Kurti dhe u përpoq të organizonte një tryezë ku të ishte dhe Vuçiç, i cili shmangu pjesëmarrjen me justifikimin se po ndiqte situatën në veri.