Ndërsa tensionet mes Washingtonit dhe Moskës vijojnë të rriten, ambasadori amerikan John Sullivan ka njoftuar se do të kthehet në Washington. “Do shkoj të flas vetë, direkt, me Shtëpinë e Bardhë”, tha ai në një deklaratë.
Ambasadori amerikan në Moskë, John Sullivan, do të kthehet këtë javë në Ëashington për të biseduar direkt me zyrtarët e lartë të Shtëpisë së Bardhë sa i përket tensioneve midis Amerikës dhe Rusisë.
“Besoj se është e rëndësishme për mua të flas drejtpërdrejt me kolegët e mi të rinj në administratën e Biden, në Uashington, për gjendjen aktuale të marrëdhënieve dypalëshe midis Shteteve të Bashkuara dhe Rusisë,” tha Sullivan në një deklaratë.
Ambasadori shtoi se do të kthehet në Moskë në javët e ardhshme, përpara ndonjë takimi mes Presidentëve Biden dhe Putin.
Njoftimi për këtë vizitë të diplomatit amerikan erdhi pasi Rusia njoftoi dëbimin e 10 diplomatëve amerikanë në shenjë hakmarrjeje për sanksionet e reja nga administrata e Biden.
Pak javë më herët, presidenti Biden e cilësoi homologun rus Vladimir Putin si një “vrasës”.
Ndërkohë, që tensionet midis Moskës dhe Uashingtonit kanë arritur kulme historike në javët e fundit.
Rusia vijon grumbullimin e trupave ushtarake përgjatë kufijve të Ukrainës, duke shkaktuar frikën e një pushtimi. Burgosja e Alexei Navalnyt, kritik ndaj presidentit Putin, gjithashtu ka kontribuar në dinamikën e marrëdhënieve dypalëshe. Ndërkohë, këtë të martë, Rusia dërgoi një flotë me mbi 20 anije luftarake në Detin e Zi.
Në një telefonatë të fundit, pak ditë më herët, presidenti Biden i propozoi homologut Putin një samit në një vend të tretë.
Rusia ka thënë se po shqyrton propozimin për këtë samit.