Kryetari i Lidhjes Demokratike të Kosovës, Lumir Abdixhiku, ka bërë të ditur se LDK-ja do të qëndrojë në opozitë dhe do ta respektojë preferencën e popullit të Kosovës.
Ai përmes një statusi në “Facebook” ka thënë se qëndrimet e LDK-së mbesin të njëjtat që janë dhënë më parë, ndërkohë që ka shtuar se për gjithçka tutje do të vendoset brenda partisë. Abdixhiku pati thënë në konferencën pas përfundimit të procesit të votimit më 9 shkurt, se “nëse populli vendos të na mbajë në opozitë, ne do të qëndrojmë në opozitë”.
“Pavarësisht të gjithave, siç e thash në Konferencën e natës së zgjedhjeve, ky rezultati nuk është rezultat ndryshimi për Kosovën; sepse populli i Kosovës ka tjera preferenca. I respektojmë. Do t’i respektoj këto preferenca sepse nuk di ndryshe! Qëndrimet e mia e të LDK-së paraelektorale mbeten edhe zotime të sotme. Le të mësohemi me një politikë ku mbajtja e fjalëve është standard bazik e ku marrja e pushtetit me çdo kusht nuk është qëllim! Gjithsesi, për të gjitha këto do të vendosim si një!” ka shkruar ai.
Abdixhiku ka kritikuar edhe Komisionin Qendror të Zgjedhjeve për shkak të vonesës së numërimit të votave.
“Përveç kësaj, kemi dhe një KQZ që as edhe një gjë bazike për të cilën kishte kohë plot 4 vjet të përgatitet – si numërimi i votave – nuk arrinë ta bëjë. Kthehuni në metodë klasike aman! Numërim është ky!” shkroi më tej.
Ndërkaq, ka shprehur me bindje se deri në fund LDK-ja do t’i ketë 180 mijë vota.
“Po, ky është rezultat i mirë pas rënies historike… E rëndësishme që kemi rigjetur njëri tjetrin, jemi kthyer në bazë. E rëndësishme që kemi rikthyer veten në numrat tanë historik. Kjo është baza jonë!” ka thënë Abdixhiku.