Rritja e krimit në vend, bën që LZHK-ja nëpërmjet Ekrem Spahiut, kërkon që në Shqipëri të rikthehet dënimi me vdekje për vrasje të rënda me dashje. Sipas tij, në bashkëpunim me Këshillin e Europës, vendi ynë mund ta ketë sërish këtë dënim kapital, të paktën derisa të anëtarësohemi në BE.
“Duke marrë parasysh këtë gjendje të rëndë të kriminalitetit, a ka ardhur koha të rishikohen sanksionet penale në drejtim të ashpërsimit të tyre për krime të rënda kundër jetës, duke përfshirë këtu edhe dënimin me vdekje? Për ne është e domosdoshme që për disa kategori të mirëpërcaktuara veprash shumë të rënda, në negocim dhe në mirëkuptim edhe me Këshillin e Europës, të rikthehet dënimi me vdekje derisa Shqipëria të bëhet anëtare e BE.
Familjarët e viktimave do të ndjehen më të lehtësuar për dhënien e drejtësisë. Burgimi i përjetshëm që është sot për të tilla raste përbën një kosto të jashtëzakonshme në të gjitha drejtimet për familjarët e një të burgosuri. Do të ulej kostoja për sigurinë e këtij kontingjenti shumë të rrezikshëm, të cilët edhe të burgosur do të përpiqen të shtojnë krimet për të rifituar lirinë.
Organet e drejtësisë do të kenë më pak hapësirë për të abuzuar me ligjin. Dënimi me vdekje duhet të rezervohet vetëm për krimet e rënda të vrasjes me dashje. Një rast unik për këtë janë Shtetet e Bashkuara të Amerikës, vendi klasik i demokracisë dhe i të drejtave të njeriut. Me rikthimin e dënimit me vdekje do të bëheshim shtet serioz”, tha Spahiu.