Kryetarja e Lëvizjes Socialiste për Integrim, Monika Kryemadhi iu ka bërë thirrje strukturave në qarqe që të bëhen gati për revolucion.
Në një takim me Komitetin Drejtues Kombëtar të LSI-së, Kryemadhi u shpreh se rrëzimi dhe largimi i kryeministrit Edi Rama përkthehet në krijim shansesh të barabarta për të gjithë shqiptarët.
“Jemi të vendosur më shumë se kurrë për të ardhmen e fëmijëve të shqiptarëve. Jemi të vendosur për të kthyer Shqipërinë në shtëpinë e shqiptarëve. Do e vendosim aksionin politik aty ku duhet dhe t’u kthejmë dinjitetin shqiptarëve. Komisionieri Hahn kërkon hapur dhe ka nxjerrë kush është problemi i zvarritjes së dialogut politik dhe i reformave në Shqipëri.
LSI është flakur për të mos e thënë e përdorur dhe ka shërbyer si një vegël për të kapur strukturat e shtetit për t’i shërbyer një sekti kriminal. Dua që të bëj një sqarim të thjeshtë për sa i përket anëtarëve të komitetit drejtues nga qarqe jashtë Tiranës, nuk ka më pritje, bëhuni gati për revolucion, protesta, revolta koncerte, çfarë të doni ju. Nuk ka më kohë për të pritur”, deklaroi Kryemadhi.