Kryeministri i Pakistanit, Imran Khan, i cili arriti të mbajë pushtetin pasi një mocion mosbesimi kundër tij u refuzua të dielën, pretendoi se zyrtari amerikan Donald Lu ishte përfshirë në një komplot për të rrëzuar qeverinë e tij.
Kryeministri i Pakistanti, Imran Khan, arriti t’i mbijetojë përpjekjes së opozitës për ta rrëzuar nga pushteti pasi një mocion mosbesimi ndaj tij u refuzua nga nënkryetari i Asamblesë Kombëtare. Por kryeministri Khan pretendoi se ishte një “komplot i huaj”.
Imran Khan pretendoi se Donald Lu, zyrtari më i lartë amerikan që merrej me Azinë Jugore në Departamentin e Shtetit të SHBA, ishte i përfshirë në komplotin e supozuar për të rrëzuar qeverinë e tij.
Imran Khan pretendoi se Donald Lu e paralajmëroi të dërguarin pakistanez në SHBA, Asad Majeed, se do të kishte implikime nëse kryeministri pakistanez i mbijetonte votimit të mosbesimit në Asamblenë Kombëtare.
Donald Lu ka shërbyer në Indi dhe Pakistan si Oficer Politik. Gjithashtu ai ka shërbyer si Asistent Special i Ambasadorit në Nju Delhi, Indi. Donald Lu ka qenë ambasador i SHBA-së në Shqipëri, post në të cilin u zëvëndësua nga Yuri Kim. Po ashtu ai flet shqip, rusisht, gjeorgjiane, azerbajxhanisht, urdu, hindisht dhe krio afrikano-perëndimore.