Kryeministri Edi Rama ka dhënë dje një lajm shumë të mirë sa i takon procesi të lëvizjes. Duke folur në rrjetet sociale nga zyra e tij, ai u shpreh se javën që vjen do nisin lehtësirat e para të lëvizjes. Po ashtu ai tha se nga java e dytë do vihet në zbatim një plan konkret, nëse gjithmonë bie numri i të infektuarve. “Po detajojmë një plan të lehtësimit gradual të masave që do të nisë zbatimin sapo të shohim rënien e kurbës së të infektuarve. Nuk na i thotë dot askush se kur do ndodhë. Por deri në mes të prillit ne do mësojmë se sa thellë është shtrirë ky armik i padukshëm. Po studiojmë disa lehtësime të lëvizjes që i kemi gati, duke filluar me pikatore nga java e ardhme, nëse numrat deri të dielën na e lejojnë”, tha ai. Më tej shefi i qeverisë u ndal dhe te lehtësirat e paketës fiskale. Sipas tij, pjesë e saj do jetë dhe sistemi i transportit.
“Mbështetje financiare do të ketë dhe për taksitë. Ndërkohë do ketë dyfishim të ndihmës ekonomike. Plani financiar ka hyrë në zbatim dhe të gjitha do marrin paratë e premtuara. E dyta, pavarësisht presionit mbi familjet dhe ekonominë kombëtare, bujqësia nuk është ndalur së prodhuari”, tha ai.