Kryeministri grek Kyriakos Mitsotakis ka vendosur të hapë debatin për martesat e të njëjtit seks dhe prindërimin, pasi pritet të trajtojë gjerësisht këtë çështje në një intervistë televizive të mërkurën.
Ai pritet të mbështesë “barazinë martesore” dhe të shpallë një projekt-ligj të parashikuar që u jep çifteve të të njëjtit seks të drejtën për t’u bashkuar në një martesë civile në vend të një marrëveshjeje partneriteti. Gjithashtu spekulohet se projektligji për këtë çështje nuk do të marrë shumë kohë për të dalë për votim.
Projektligji mund të sigurojë gjithashtu të drejtën e birësimit, me të drejta të plota dhe të barabarta për fëmijët e rritur nga një çift i të njëjtit seks. Megjithatë, qeveria nuk ka ndërmend të ligjërojë të drejtën për riprodhim të asistuar mjekësor nëpërmjet një nëne surrogate. Mitsotakis kishte paralajmëruar që në fillim të mandatit se projektligji do të vinte brenda katër viteve, por vendosi ta çojë projektligjin para zgjedhjeve evropiane.