Kryetari i PD-së, Lulzim Basha është takuar me banorë të Paskuqanit duke i ftuar në protestën e 16 marsit. Mes tyre ai u takua me Kujtimin, i cili prej 7 muajsh kishte hapur një mobileri në zonë. Kujtimi është nga Mallakastra, dhe duke folur me Bashën i thotë se një tjetër në fshatin e tij i ka marrë tokën me ligjin 7501.
Kujtimi thotë se tokën ai që e ka marrë me këtë ligj jeton në Tiranë dhe atë e ka mbjellë me ullinj. Pronën e kishte nga gjyshi i tij dhe kritikon ligjin e pronave që solli Berisha në 1991 për ndarjen e tokës bujqësore.
Basha mundohet ti shpjegojë qytetarit se pavarësisht se tjetri e ka marrë tokën me këtë ligj, mund të fitojë kompensimin. Por Kujtimi këmbëngul: Po po, me 500 lekë/metri. S’dua lekët unë, dua tokën.
Ai vijon më tej duke i thënë Bashës se të gjitha që ai thotë nuk mund të bëhen. “Dhe unë të vij në pushtet, jam i vetëdijshëm që të gjitha nuk bëhen”, tha Kujtimi, duke shtuar se të paktën të mbahen një pjesë e premtimeve.