Në mbledhjen e fundit të Komisionit të jashtëm të Parlamentit Europian eurodeputeti Eduard Kukan përshëndeti rekomandimin e dhënë për hapjen e negociatave me Shqipërinë dhe Maqedoninë e Veriut, por bëri dhe një apel për politikën shqiptare.
“Për sa i përket Shqipërisë, është në një situatë të brendshme politike të tensionuar , më 30 qershor janë zgjedhjet lokale. Partitë politike të shkojnë mbi interesat partiake, të marrin vendime në favor të popullit shqiptar që e meriton këtë vendim”, tha Kukan.
Ai shtoi se të gjitha këto vende meritojnë mbështetjen e Bashkimit Evropian. “Ju e thatë mirë se çfarë duhet të presim nga partnerët tanë, por edhe ne duhet të bëjmë më shumë. Duhet të shohim mjetet që kemi në dispozicion për të pasur një presion pozitiv mbi kolegët tanë të Ballkanit Perëndimor. Duhet ta bëjmë pëndryshe besoj se rrezikohet të humbasim kredibilitetin dhe autoritetin. Për më tepër i shërben dhe sigurisë në rajon”, tha Kukan.
