Mirela Kumbaro zbuloi gjatë një interviste televizive se gjatë këtij sezonit turistik u zhvesh nga kostumi i ministres së Turizmit të Mjedisit, duke zënë vendin e organeve kompetente që merren me monitorimin e plazheve.
Me qëllim për të mos u njohur nga askush, ajo u shpreh se vendosi të maskohej dhe të dilte në terren për të inspektuar dhe verifikuar problematikat e raportuara nga qytetarët nëpër rrjete sociale.
“Në mes të Dhërmiut, mes dy plazheve private unë kam bërë inspektime në terren gjatë gjithë sezonit, e fshehur nën syze dhe kapele, anonime. Nuk më ka njohur askush dhe kam lëvizur nëpër territor sa herë që kishte reagime në “Facebook”, shkoja vetë dhe e verifikoja e maskuar. Kam parë plazhe në Dhërmi, mes dy plazheve private, plazh publik që ishte përgjysmë bosh, ndërkohë që dy plazhet anash ishin plot. Kjo mania për të shkuar në mëngjes apo për të gjetur një moment që ca shezlongë janë bosh, nuk ia vlen që të zgjatemi”, u shpreh Kumbaro.
Pavarësisht gatishmërisë së Kumbaros për t’iu përgjigjur shqetësimeve të qytetarëve, kjo deklaratë befasuese vë në pikëpyetje punën e task-forcës së turizmit për monitorimin e plazheve.
A thua Kumbaro ka “ngatërruar” detyrën e ministres që ka në varësi disa institucione ligjzbatuese duke marrë rolin e gazetares së emisioneve investigative? Apo nuk ka besim tek ata që ka në varësi?