Nën rrebeshin e djeshëm Tirana nuk e gjeti dot golin as nga pika e penalltisë, ndërsa histori ndryshoi sot në “Selman Stërmasi”, ku u luajtën 65 minutat e mbetura nga përballja e djeshme për 1/8-at e finaleve të Kupës së Shqipërisë.
Fitoi Tirana 2-0, me dy gola në harkun e 5 minutave, në fillim të ndeshjes. Tirana e nisi fuqishëm dhe ushtroi presion konstant, derisa në minutën e 10-të të rifillimit, e 35-ta në total, Michael Ngoo u la i vetëm në zonën vlonjate, pati kohë të kontrollonte topin e të matej mirë, derisa gjuajti dhe mposhti portierin Koliçi.
Ky i fundit priti 11-metërshit e Hasanit dje, por sot gaboi te goli i dytë i Tiranës, sepse një goditje dënimi nga distanca e befasoi, edhe pse Hoxhallari nuk është se gjuajti shumë fort dhe topi ishte thuajse në qendër.
Mision i kompletuar shumë lehtë për bardheblutë, që falënderuan dhe më pas kontrolluan mirë ndeshjen, edhe pse në pjesën e dytë sfida u hap krejtësisht dhe rastet ishin të shumta, me portierin Abibi që u bë vendimtar në disa raste, duke mohuar golin vlonjat.
Pati edhe momente nervozizmi, sepse Torassa u ndal disa herë me faulle të qëllimshëm nga lojtarët e Tiranës dhe në minutën e 85-të Hasani ia hodhi paq me karton të verdhë, sepse ndërhyri shumë keq nga pas për të ndalur argjentinasin e Flamurtarit.
Përfundimisht, Tirana hedh një hap gjigant drejt çerekfinaleve, ndërsa Flamurtari vijon të jetojë ditë të turbullta, pa asnjë siguri për vazhdimësinë, edhe pse në klub e në ekip askush nuk flet për situatën financiare.
KUPA E SHQIPËRISË
Stadiumi “Selman Stërmasi”, Tiranë
TIRANA-FLAMURTARI 2-0
Shënues: Ngo 37′, Hoxhallari 40′
Tirana: Abibi, Kërçiku (Doka 69′), Turtulli, Imami, Hoxhallari, Maveje, Karabeci, Hasani, Halili (Muçi 75′), Greca, Ngo (Çelhaaka 90+3′). Trajner: Ardian Mema
Flamurtari: Koliçi, Siljanovksi (Liçaj 63′), Deliaj, Pollozhani, Kotobelli, Mustafa (Beqaj 70′), Batha, Useini (Rrapaj 80′), Torasa, Musta, Bushiç. Trajner: Ilir Daja
Karton i verdhë: Hoxhallari 13′, Karabeci 73′, Hasani 85′ / Useini 43′, Deliu 49′, Torasa 85′
Gjyqtarë: Kreshnik Bajramaj, Dojando Myftari, Mario Shazivari, Kridens Meta