Investimet e huaja, remitancat dhe rritja e eksporteve shqiptare janë faktorët që kanë ndikuar në forcimin e lekut, sipas analizës së bërë kursit të këmbimit valutor nga Banka e Shqipërisë.
“Në optikën afatmesme e afatgjatë, forcimi i kursit të këmbimit është në përputhje me teorinë ekonomike dhe faktorët makroekonomikë. Kështu, trendi forcues i kursit të këmbimit pasqyron përmirësimin e pozicionit të jashtëm të ekonomisë dhe rritjen e interesit për të investuar në instrumente kursimi në lekë në tregun e brendshëm financiar. Përmirësimi i pozicionit të jashtëm të ekonomisë ilustrohet nga: ngushtimi i qëndrueshëm dhe i vazhdueshëm i bilancit të shkëmbimeve tregtare me jashtë, kryesisht në reflektim të zgjerimit të shpejtë të eksporteve shqiptare; hyrja e lartë e valutës në vend, kryesisht në formën e investimeve të huaja direkte, por edhe në formën e remitancave”, thuhet në raport.
Vijimi i mbiçmimit të kursit të këmbimit me ritme të përshpejtuara do të rrezikonte arritjen e objektivit të inflacionit në afatin e mesëm, ndaj dhe Banka e Shqipërisë në muajin qershor bëri ndërhyrje të jashtëzakonshme, por të përkohshme, në tregun e brendshëm valutor. Sipas Bankës së Shqipërisë, kjo ndërhyrje arriti të stabilizojë ecurinë e kursit të këmbimit dhe të krijojë premisat për funksionimin normal të këtij tregu. Po ashtu vlerësimet e Bankës së Shqipërisë shprehin se rreziqet e kursit mbi objektivin e inflacionit kanë ardhur në reduktim.