Lajmi se Vangjush Dakos dhe familjes së tij i është ndaluar hyrja në Shtetet e Bashkuara u bë publik këtë të martë nga Zëri i Amerikës. Megjithatë ai nuk është zyrtari i parë i lartë i Shqipërisë që i ndalohet një gjë e tillë, kur më herët kemi deputetin Tom Doshi dhe ish kryeprokurorin Adriatik Llalla.
Adriatik Llalla, shkurt 2018
Departamenti i Shtetit i ndaloi hyrjen në Shtetet e Bashkuara ish- Prokurorit të Përgjithshëm të Shqipërisë Adriatik Llalla në shkurt të vitit 2018.
Vendimi i sekretarit të shtetit të asaj kohe Rex Tillerson, miratonte masën e ndalimit për shkak të përfshirjes së ish zyrtarit shqiptar në raste të mëdha korrupsioni.
Përveç zotit Llalla, Sekretari Tillerson ka miratur ndalimin e hyrjes në Amerikë edhe të bashkëshortes së tij Ardjana Llalla, të vajzës Eni Llalla dhe një fëmije tjetër të tij, që nuk ka shtetësinë amerikane.
Tom Doshi, prill 2018
Ishte ambasada amerikane në Tiranë që publikoi vendimin e DASH për Tom Doshin. Në vendimin e atëhershëm të DASH thuhej se “Në bazë të ligjeve amerikane, kur Sekretari i Shtetit, ka informacione të besueshme se një zyrtar i huaj është përfshirë në raste madhore korrupsioni, ose shkelje të të drejtave të njeriut, atij dhe familjes së tij të ngushtë i ndalohet hyrja në Amerikë. Sekretari i Shtetit mund t’ia bëjë njoftimin zyrtarit privatisht ose në publik. Në bazë të njoftimit të sotëm, deputeti Doshi, bashkëshortja e tij Xhovana Doshi, vajza e madhe Briana Doshi, djali në moshë madhore James Doshi dhe fëmijët në moshë të mitur nuk lejohen të hyjnë në Amerikë”.
Vangjush Dako, korrik 2019
Vendimi, i marrë nga Sekretari i Shtetit, thekson se kryetari i bashkisë Dako është përfshirë në raste madhore korrupsioni. Në bazë të njoftimit të sotëm, Vangjush Dako, bashkëshortja e tij Alba Dako, djali Xhulio Dako dhe vajza e tij Kejsi Dako nuk lejohen të hyjnë në Amerikë.