Kushëriri i Hamide Magashit, e cila u vra një ditë më parë nga ish-bashkëshorti para Maternitetit në Prishtinë, u shpreh se martesa mes tyre u realizua në një kohë shumë të shkurtër.
Në një lidhje telefonike në emisionin “Shqipëria Live”, ai tregoi se arsyeja që Magashi u nda nga Halili ishte dhuna e tmerrshme dhe e vazhdueshme që ajo përjetonte.
“Ne jemi kushërinj, divorcin e kanë bërë me rregulla, me ligj, ka ndodhur para 4 muajve, I thanë ke me e lind fëmijën dhe me ia dhënë, prej dhunës u ndanë, ishte i dhunshëm, ka bërë denoncim në polici, ka pas urdhër mbrojtje. Unë jo, nuk kam pas kontakt me Sokolin, u martuan shumë shpejt, për një jave, 10 ditë shkoi të jetonte tek familja e tij. Nuk e di si janë takuar, por shpejt ka shku tek shtëpia e Sokolit. Edhe familjarët kanë ushtruar dhunë. Nuk ka mundur policia me vëzhgu. Ajo ka shku për të ble diçka të vetat, e ka përcjellë ai”, tha kushëriri i viktimës.
Ditën e djeshme, Sokol Halili qëlloi për vdekje me armë zjarri ish-bashkëshorten e tij shtatzënë Hamide Magashi para Maternitetit në Prishtinë. 35-vjeçarja ishte në javët e fundit të shtatzënisë. Ajo ishte paraqitur për kontroll pranë Maternitetit, por në oborr u konfliktua me Halilin, i cili e ka qëlluar atë disa here me armë.