Gjatë vizitës në Mynih Ministrja e Arsimit dhe Sportit Evis Kushi zhvilloi një takim në Katedrën e Albanologjisë të Universitetit “Ludwig-Maximilians” në Mynih, ku diskutoi nga afër me studentë të Masterit në Albanologji dhe Prof. Bardhyl Demiraj, drejtues i kësaj katedre.
Në një postim në rrjete sociale ministrja Kushi shprehet krenare që marrëveshja e nënshkruar për mbështetjen financiare të Katedrës së Albanologjisë, garanton tashmë ruajtjen dhe vijueshmërinë e programit të gjuhës shqipe, si dhe hap dyert për një bashkëpunim më të thelluar në fushën e Albanologjisë me Ministrinë e Arsimit dhe universitetet shqiptare.
Kushi shpreh mirënjohje për të gjithë pedagogët dhe studentët që kanë dhënë kontribut në konsolidimin e këtij programi ndër vite që prej themelimit në vitin 1961 nga Martin Camaj!
Postimi në Facebook:
Gjatë vizitës në Katedrën e Albanologjisë të Universitetit “Ludwig-Maximilians” në Mynih, zhvillova një bashkëbisedim me Prof. Bardhyl Demiraj dhe studentë të Masterit në Albanologji, i vetmi program master jashtë hapësirës shqipfolëse për Albanologjinë.
Krenare që marrëveshja që nënshkruam për mbështetjen financiare të kësaj katedre, garanton ruajtjen dhe vijueshmërinë e këtij programi, si dhe hap dyert për një bashkëpunim më të thelluar në fushën e Albanologjisë me Ministrinë e Arsimit dhe universitetet shqiptare.
Mirënjohje për të gjithë pedagogët dhe studentët që kanë dhënë kontribut në konsolidimin e këtij programi ndër vite, që prej themelimit në vitin 1961 nga Martin Camaj!
