Kuvendi do të nisë sot me betimin e tre deputetëve të rinj të dalë nga listat e kandidatëve të opozitës, përfaqësues të LSI-së.
Bëhet fjalë për Ralf Gjoni, Nimet Musai dhe Enada Koçiraj, që pritet të jenë sot në seancën plenare.
Gjatë mbledhjes së djeshme, KQZ miratoi dhënien e mandatit të deputetit Ralf Gjoni, i cili do të zëvendësoje mandatin e dorëhequr të Klajda Gjoshës. Krahas Gjonit, kandidati tjetër që pritet të marrë sot mandatin e deputetit është edhe Nimet Musai, i cili do të zëvendësojë Petrit Vasilin në sallën e Kuvendit dhe Enada Koçiraj që merr mandatin e Shezai Rrokajt në Vlorë.
Me miratimin e 3 kandidatëve, numri i deputetëve të rinj që futen në Parlament shkon në 13. Ndërsa balancat politike tek opozita transformohen në krahasim me zgjedhjet e vitit 2017. Me marrjen e mandateve të deputetit të tre kandidatëve të LSI-së, numri i deputetëve nga Lëvizja Socialiste për Integrim ia kalon atyre të PD-së. Kjo, pasi nga lista e LSI-së ka pasur më shumë kandidatë që kanë pranuar të marrin mandatin e deputetit, duke e çuar numrin e tyre në 10.
Këtij numri i shtohet edhe mandati i Lefter Kokës, i cili që në fillim nuk pranoi të jepte dorëheqjen nga mandati, duke e çuar numrin total në 11. Ndërsa Partia Demokratike ka në Parlament 5 deputetë, tre që kanë pranuar të marrin mandatin dhe dy deputetët, Rudina Hajdari dhe Myslym Murrizi, që nuk dhanë dorëheqjen.