Kuvendi do të mblidhet sot, më 13 korrik, në seancë plenare, ku deputetët do të shqyrtojnë një sërë projekt-rezolutash që lidhen me vlerësimin e veprimtarisë së institucioneve kryesore të vendit gjatë vitit 2025.
Seanca do të nisë me miratimin e procesverbaleve të mbledhjeve plenare të datave 30 qershor dhe 2 korrik. Më pas, deputetët do të diskutojnë dhe votojnë projekt-rezolutat për vlerësimin e veprimtarisë së Komisionit Qendror të Zgjedhjeve (KQZ), Inspektoratit të Lartë të Deklarimit dhe Kontrollit të Pasurive dhe Konfliktit të Interesave (ILDKPKI), Bankës së Shqipërisë, Autoritetit të Mbikëqyrjes Financiare (AMF), INSTAT-it, Autoritetit të Komunikimeve Elektronike dhe Postare (AKEP), Radio Televizionit Shqiptar (RTSH), Autoritetit të Mediave Audiovizive (AMA), Entit Rregullator të Energjisë (ERE) dhe Entit Rregullator të Ujit (ERRU).
Gjatë seancës pritet të zhvillohen edhe diskutime mbi çështje të evidentuara nga zgjedhësit, të cilat mund të ngrihen nga deputetët gjatë debatit parlamentar.