Kuvendi ka miratuar disa projektligje që lidhen me sektorin e bujqësisë, ndërsa gjatë votimeve ra në sy qëndrimi i deputetit socialist Erion Braçe, i cili nuk votoi në një linjë me mazhorancën për dy prej nismave. Ndërkohë, opozita nuk mori pjesë në votime, pasi bojkotoi seancën plenare.
Projektligji “Për dëftesat tregtare mbi produktet bujqësore” u miratua me 71 vota pro, 1 abstenim dhe 1 votë kundër. Erion Braçe abstenoi, ndërsa kundër votoi deputeti i Partisë Mundësia, Erald Kapri.
Projektligji “Për censin e bujqësisë” u miratua me 77 vota pro dhe 1 votë kundër, e cila ishte sërish e Erald Kaprit.
Edhe projektligji “Për disa ndryshime dhe shtesa në ligjin ‘Për menaxhimin e kimikateve’” kaloi me 78 vota pro dhe 1 kundër, votë e deputetit Kapri.
Me 76 vota pro dhe 1 kundër, Kuvendi miratoi edhe ndryshimet në ligjin “Për akuakulturën”, ndërsa vota kundër ishte sërish e Erald Kaprit.
Ndërkohë, projektligji “Për disa shtesa dhe ndryshime në ligjin ‘Për mbrojtjen e tokës bujqësore’” u miratua me 78 vota pro dhe 2 kundër. Kundër kësaj nisme votuan Erion Braçe dhe Erald Kapri, duke e bërë Braçen të vetmin deputet të shumicës që votoi kundër një prej projektligjeve të qeverisë gjatë kësaj seance.