Me 114 vota pro, Kuvendi ka miratuar protokollet e NATO-s për aderimin e Suedisë dhe Finlandës në Aleancë.
“Morën pjesë 114 deputetë, 114 vota pro” njoftoi Nikolla.
Komunikimi i rezultatit të votimit u shoqërua me duartrokitje nga deputetët në sallë ndërsa ambasadorja e Suedisë në Shqipëri, Elsa Hastad, përshëndeti deputetët me dorë në zemër nga llozha.
Deputeti i Partisë Socialiste Pandeli Majko tha se ky është një akt solidaritet që tregon se kush prek sovranitetin e tyre ka prekur edhe Shqipërinë.
“Dua të bëj një koment të shkurtër. Mendoj se akti i sotëm i parlamentit për anëtarësimin e Suedisë dhe Finlandës në NATO nuk është vetëm moment kolektiv por akt i mirëfilltë solidariteti. Kush prek sovranitetin e tyre, prek edhe Shqipërisë. Federata ruse po shkatërron ligjin ndërkombëtar.
Ky moment kolektiv i të qëndruarit bashkë na bën edhe më të fortë. Me këtë pohim të sotëm me gjithë polarizimin politik vendimi i përbashkët është një gjest kuptimplotë dhe i rëndësishëm që ripohon qëndrimet e politikës shqiptare si anëtare e NATO-s. Ky është një nga aktet më të rëndësishme që ky parlament ka marrë sot”, tha ai.