Pas vendimit të sotëm të KLGJ-së për largimin e Ardian Dvoranit nga Gjykata e Lartë, përfundon edhe detyra e tij si kryetar i Këshillit të Emërimeve në Drejtësi.

Fati i Dvoranit u vulos me 6 vota pro dhe 3 kundër, ndërsa gjyqtarit që pati një histori replikash me Ilir Metën, iu propozua një vend në Gjykatën e Apelit.

Pas largimit të tij, pritet që kryesimin e Këshillit të Emërimeve në Drejtësi ta marrë anëtarja e Gjykatës Kushtetuese Vitore Tusha, detyrë që do të jetë e përkohshme deri në hedhjen e shortit që do të përcaktojë anëtarin e ri të KED.

Kush është Vitore Tusha?

Tusha është anëtare e Gjykatës Kushtetuese nga viti 2008, por dhe anëtare e Këshillit të Emërimeve në Drejtësi. Emri i saj është i njohur në fushën e drejtësisë. Një ndër çështjet më mediatike të saj ishte ajo e vitit 1995, kur Tusha rrëzoi kërkesën e ish-kryeministrit Fatos Nano.

Ky i fundit kërkoi lirimin e parakohshëm nga burgu, ndërsa ishte dënuar me 12 vjet heqje lirie. Megjithatë ish-kryeministri socialist siguroi lirinë pas ndryshimeve në Kodin Penal.

Tusha ka shpallur si jo kushtetuese çështje si Marrëveshja e Detit, Ligjin e Lustracionit. Në vitin 2018 ajo u propozua nga presidenti Ilir Meta për të marrë drejtimin e KLSH, por u refuzua nga mazhoranca.