Një prej operatorëve të mediave në vend, Alket Metko, është ndarë nga jeta pas një sëmundje të rëndë, betejën me të cilën nuk ka arritur ta fitojë.
Lajmin e kanë dhënë miq dhe kolegë të tij, që përmes dhimbjes shprehin ngushëllimet për familjen e Metkos, dhe për 5 fëmijët e mitur që la në jetë, për humbjen e parakohshme.
Një prej mesazheve të para ka qenë ai i Mentor Kikisë, kryeredaktorit të televizionit Klan Plus, ku Metko së fundi punonte, i cili shprehet se kjo është një ditë zie për të gjithë miqtë e tij.
“Lamtumirë miku dhe kolegu ynë! Sot për ne në Klan Plus është një dite zie. Një koleg i mirë, fjalëpak dhe punëtor i palodhur, iku prej nesh. Iku pikërisht në atë moshë kur duhej të jetonte për veten, fëmijët dhe familjen e tij.
Kameramani Alket Metko e humbi betejën me sëmundjen e rëndë që e mundi në pak muaj. Në të tilla raste s’ka as fjalë për ngushëllime, por ne, kolegët e tij, bashkojmë dhimbjen tonë me atë të familjes së tij. Lamtumirë Alket! P.s: Në foto, Alketi gjatë filmimit në një protetse, ku edhe është goditur”, shkruan në postimin e tij Kikia. Edhe redaksia e Tirananews.al i shpreh ngushëllimet familjes për ndarjen para kohe nga jeta të kolegut tonë.