Zv/ministri i Brendshëm, Besfort Lamallari ishte i ftuar pasditen e kësaj të marte në studion e Klan News. Në një intervistë për gazetarin Besard Jacaj, ai foli për disa çështje, nga operacioni Tempulli e deri te ngjarjet kriminale.
E teksa u pyet për ngjarjet të cilat nuk janë zbardhur ende, Lamallari solli në vëmendje inaugurimin së fundmi të laboratorit të ADN-së, i cili sipas tij do të ndihmojë në zbardhjen e ngjarjeve, si atyre aktuale, ashtu sikurse edhe ngjarjeve të vjetra.
Besard Jacaj: Në vendin tonë gjatë viteve, apo dhe muajve të fundit janë regjistruar disa vrasje, janë cilësuar të rënda, por që mbyllen pa autor. Skema është pothuajse e njëjta, një person që kryen atentatin, largohet, makina e djegur dhe më pas policia thotë po punojmë, por ngjarjet mbeten të pazbardhura…
Besfort Lamallari: Kemi ndërkohë edhe shumë ngjarje të vjetra që janë zbardhur.
Besard Jacaj: Po flasim për këto të pazbardhurat…
Besfort Lamallari: Theksoj dhe është e rëndësishme kjo… edhe në takimin që ju përmendët më herët, vizitën e ministrit britanik këtu dhe ne pamë edhe deklaratën e tij, ku ishte shumë pozitiv dhe vlerësues ndaj përpjekjeve të Shqipërisë dhe bashkëpunimit serioz dhe shumë të kënaqshëm edhe me autoritetet britanike. Jo më kot u bë edhe ai organizim, ku ne inauguruam qendrën më të re, laboratorin e referencës së ADN-së, e cila ka ndihmuar dhe do të ndihmojë edhe në zbardhjen e ngjarjeve si aktuale, në mënyrë dhe në kohë shumë të shpejtë, por edhe ngjarjet e vjetra. Janë shumë kampionë ADN-je që janë të koleksionuara, janë të ruajtura në kushte shumë të mira në ambientet e Policisë Shkencore, është çështje kohe ripërpunimi i tyre. Do kemi shumë ngjarje të zbardhura, si dhe një reagim më të shpejtë të zbardhjes së ngjarjes, si në drejtim të ngjarjeve që ndodhin në moment, po ashtu edhe të ngjarjeve të vjetra.