Armando Cungu i ka dhënë lamtumirën Laçit dhe nuk do të jetë më në stolin e kurbinasve. Tekniku pranoi të kthehej pas zënkës të një jave më parë me drejtuesit e klubit. Por humbja ndaj Kukësit ia ka mbyllur përfundimisht diskutimet mes palëve të cilat i kanë dhënë lamtumirën njëra-tjetrës.
Në këto rrethana, klubi ka nisur kërkimin për një trajner të ri. Ndërkohë, i ka besuar skuadrën një “eksperti” që e njeh shumë mirë këtë klub pasi ndërtoi një prej cikleve më të sukseshme në drejtimin e e Laçit. Ekipi i është besuar Stavri Nicës, i cili punon me moshat e kurbinasve dhe është personazh mjaft I afërt me presidentin Laska.
Një emërim i përkohshëm i trajnerit i cili rreth një dekadë më pare mori Laçin si një skuadër që vinte nga Kategoria e Parë dhe e ktheu në një ekip me ambicie që siguroi edhe Europën dhe arriti rezultate shumë të rëndësishme me kurbinasit. Asokohe u hedhur bazat e rritjes së klubit dhe transformimit të tij në një pretendent për Europën në çdo sezon. Ai do të jetë në drejtim këtë javë, por nëse skuadra përgjigjet ashtu siç presin drejtuesit, nuk është çudi që Nica të emërohet me një kontratë afatgjatë.