I dërguari i BE-së për bisedimet Kosovë-Serbi, Miroslav Lajçak, pati sonte një darkë pune me kryeministrin e Kosovës, Albin Kurti, dhe Presidentin serb Aleksandar Vuçiç.
Pas darkës, Lajçak tha se, më 13 maj do të zhvillohet takim në nivel kryenegociatorësh.
“Mirëpresim mundësinë për një darkë joformale për diskutim rreth dialogut me kryeministrin Kurti dhe presidentin Vuçiq në Berlin. Faleminderit qeverisë gjermane për pritjen. Ne do të vazhdojmë diskutimin në nivel të kryenegociatorëve më 13 maj”, ka shkruar i dërguari i BE-së për dialogun Kosovë-Serbi, Miroslav Lajçak.
Pas gati 10 muajsh, Kurti dhe Vuçiç u takuan këtë të mërkurë në Berlin, pas takimeve ndaras që patën me kancelarin gjerman Olaf Scholz. Ky i fundit u bëri thirrje për “konstruktivitet dhe përshpejtim të dialogut, me synim njohjen reciproke”.