Kanë nisur ndryshimet në strukturat drejtuese të Policisë së Shtetit.
Pas ndryshimeve të bëra në Drejtorinë Vendore të Policisë Dibër, javë më parë ku u largua Skënder Hita dhe në vend të tij erdhi Dhimitraq Ziu, kanë nisur ndryshimet edhe në rang shefash komisariatesh.
Këtë të mërkurë është larguar nga detyra e Shefit të Komisariatit të Policisë Mat, Ervin Hasrama. Nuk dihet nëse kjo lëvizje ka qenë dorëheqje e tij apo është larguar nga lart. Sakaq, emir i përfolur në radhët e policisë për zëvendësimin e Hasramës është Besnik Lila, ish shef Komisariati në Gjirokastër, i pezulluar nga kjo detyrë një vit më parë. Megjithatë, ende nuk ka një informacion zyrtar nga policia e shtetit sa i përket drejtuesit të ri të komisariatit të Policisë së Matit.
Ndryshimet në struktrën drejtuese kanë përfshirë edhe komisariatin e Policisë në Rrëshen. Mësohet se Naim Lala i cili mbante detyrën e shefit të këtij komisariati prej më shumë se 3 vitesh është larguar në një pozicion tjetër në Tiranë. Ndërkohë, shefi i ri i Komisariatit të Rrëshenit mësohet se është emëruar Behar Caka. Ky i fundit ka një karrierë të gjatë në policinë e shtetit, kryesisht në poste drejtuese, si Shef Komisariati në Vlorë, Bulqizë etj.