Deklaratat e pajtimtarit Nikoll Shullani, i cili zotohej në emisionin investigativ italian “Le Iene” për pajtimin e gjakut dhe për dërgimin në Itali tek vrasësi i të birit, pa kontaktuar fare me familjen e emigrantit të vrarë, duket se kanë nxehur edhe më gjakrat.
Ne udhëtuam sot drejt fshatit Gojan në familjen e Mark Gjonit, i cili mohon faktin se ai kishte kërkuar para për të falur gjakun e djalit.
“Kjo nuk është e denjë për një malësor. Si mund të shes unë gjakun e tim birit. Unë nuk e kam çuar në Itali për ta shitur”, shprehet Mark Gjoni.
Babai i emigrantit të vrarë nuk kursen akuzat mbi pajtimtarin, Nikoll Shullani, i cili udhëtoi drejt Italisë për ndërmjetësim pa kontaktuar fare me familjen.
“Si mundet të shkojë Nikoll Shullani në Itali dhe të flasë për pajtim pa kontaktuar fare me familjen dhe as me mua. Nikoll Shullanin unë e kam njohur vetëm ditën që më ka ardhur në shtëpi me gazetarin italian”.
Për Mark Gjonin deklarata se ai ka kërkuar para në këmbim të gjakut të djalit ka shkelur rëndë Kanunin dhe ka prekur thellë dinjitetin e familjes së tij, aq sa shkon në qëndrime ekstreme.
“Kur e kam parë mbrëmë në media, aq i kënaqur kam qenë se edhe po t’i kisha vrarë të tërë, hasmin italian, gazetarin dhe Nikoll Shullanin, aspak i kënaqur nuk kamë qënë” shprehet në zemërim e sipër malësori, I cili konsideron se I është prekur dinjiteti I familjës.
Mark Gjoni i bindur se dikush me gjakun e të birit po kërkon të bëjë pazare ka dhe një apel për hasmin.
“Nëse arrij të vërtetoj se dikush ka marrë para për këtë çështje, mua më ka gjakun borxh, por dhe do ta denoncoj në polici. I kërkoj dhe vrasësit të tim biri, të tregojë nëse ka paguar dikund para për këtë çështje”.
Një ditë me parë mediat referuar emisionit investigativ “Le Iene” publikuan rastin duke cituar se familja Gjoni kishte kërkuar para në këmbim të faljes së gjakut për djalin e vrarë në Itali, ndaj vrasësit për të cilin Mark Gjoni dhe familja e tij kanë paralajmëruar hakmarrje.