Eros Grezda u transferua në kampionatin skocez 2 vite më parë tek një skuadër legjendare si Glasgow Rangers.
Mesfushori me tipare sulmuesi rezultoi i pafat pasi pësoi dëmtimet të cilat nuk e lejuan të shprehte potencialin e tij, ndërsa më pas në problem u kthye edhe sjellja e 24-vjeçarit. Futbollisti i Kombëtares, ne këtë merkato janari u rikthye te klubi i Osijek në Kroaci, aty ku edhe u bë i njohur. Së fundmi, në lidhje me gjakovarin ka folur edhe ish-trajneri i tij te Rangers, Steven Xherrard. Legjenda angleze ka pranuar se një pjesë të përgjegjësisë për formën që kaloi Grezda e ka edhe ai.
“Grezda nuk ia doli për asnjë moment të funksiononte dhe një pjesë të përgjegjësisë për këtë e kam edhe unë. Ai kërkonte të rikthehej te Osijek për të pasur mundësinë të luante. I urojmë atij fat, pasi kthimi i tij në kampionatin kroat nuk është një problem për ne”.
Kujtojmë që 24 vjecari luajti 13 takime me Rangers duke gjetur rrugën e rrjetës 2 herë. Tashmë, sulmuesi kuqezi do të synojë që me fanellën e Osijek të rikthehet edhe një herë në formën optimale për të tentuar më pas katapultimin në një klub prestigjoz, pa harruar edhe rikthimin në Kombëtare.