Akti i Lekë Lalaj ishte për t’u vlerësuar nga Bashkia Mat. Ai u vra teksa “luftoi” për të shpëtuar disa jetë njerëzish të përfshirë në një konfikt të armatosur.
Ngjarja ndodhi vite më parë, në qendër të qytetit. Disa persona u konfliktuan me armë dhe thika, sakaq Lekë Lalaj ndërhyri për të shuar konfiktin dhe për t’u shpëtuar jetën disa personave.
Njëri nga plumbat e agresorit e qëlloi në zemër dhe ai ndërroi jetë, duke lënë pas 4 fëmijë të vegjël dhe shumë të afërm.
Sot Këshilli Bashkiak Mat i dha të ndjerit titullin “Qytetar Nderi” për: “aktin e tij të lartë e të rrallë që rrezaton në çdo kohë dritë mirësie, si simbol i një njeriu që e donte jetën të bukur për të gjithë, si edhe për vlerat e larta morale e qytetare”.
Kryetari i Bashkisë Mat Agron Malaj dhe këshilltarët që e morën fjalën u shprehën se akti i Lekë Lalës ishte i veçantë dhe mjaft human. Ai humbi jetën tragjikisht për të shpëtuar disa jetë të tjera.
Familjarët dhe të afërmit falenderuan Bashkinë Mat, Këshillin Bashkiak dhe firmëtarët që kërkuan vlerësimin e aktit civil, human dhe njerëzor të Lekë Lalaj.
