Hyrja në fuqi e ligjit të Kadastrës i ka hapur rrugë dhe amnistisë së re për pronat e paregjistruara në zyrat e Hipotekës.
Zyrat vendore të Regjistrimit të Pasurive të Paluajtshme kanë nisur lajmërimin e të interesuarve që të aplikojnë brenda një afati 30 ditor, duke përfituar kështu nga amnistia.
“Të gjitha kamatvonesat që janë të gjeneruar nga sistemi i regjistrimit të pasurive të paluajtshme deri në hyrjen në fuqi të këtij ligji, për shkak të mosaplikimit në kohë për regjistrimin e dokumentacionit sipas nenit 39 të ligjit 33/2012 “Për regjistrimin e Pasurive të Paluajtshme”, ndryshuar, SHUHEN“, thuhet në njoftimin e ZVRPP vendore.
Subjektet qe aplikojnë brenda afatit të përcaktuar në pikën 1 të këtij neni paguajnë vetëm tarifën aktuale për regjistrimin e aktit. Ky afat fillon nga data 25 mars deri më 25 prill 2019.
Në ligjin e mëparshëm parashikohej se nëse një kërkesë për regjistrim paraqitej më vonë se 30 ditë nga data e realizimit të tij, përveç tarifës së regjistrimit, për çdo ditë vonesë, që ka kaluar nga kjo datë, paguhej kamatëvonesë, e barabartë me 10 për qind të tarifës së regjistrimit, por jo më shumë se 300 000 lekë.
Një vendim i tillë është njoftuar edhe më herët nga Drejtori i Përgjithshëm i Kadastrës, Artan Lame.