Kolegji Zgjedhor ka rrëzuar kërkesën e Partisë së Unitetit Kombëtar për çregjistrimin nga zgjedhjet e 30 qershorit, në një vendim të parevokueshëm për të pasur zgjedhje më 30 qershor.
Kreu i kësaj partie, Idajet Beqiri edhe pse në seancë tha se e konsideron të pavlefshëm dekretin e kreut të shtetit për anulimin e zgjedhjeve padinë e ngriti mbi bazë të këtij dekreti.
Pas dhënies së vendimit nga Kolegji, Beqiri tha se është i detyruar të zbatojë vendimin e Kolegjit Zgjedhor dhe do të shkojë në zgjedhjet e kësaj të diele.
I pyetur nëse në vendimin e zbardhur të Kolegjit Zgjedhor do të flitet për dekretin e Metës ai tha se ishte pikërisht ky dekret thelbi i padisë.
“Thelbi i padisë tonë ky ishte, se çdo padi ka një shkak, pa shkak nuk ngrihet padia. Shkak ishte dekreti i Presidentit, derisa Gjykata Kushtetuese në vitin 2017 ka thënë që ky tip dekreti është akt individual administrativ dhe nuk mund të kundërshtohet në gjykatën Kushtetuese”, vijoi ai.