Kryetarja e Kuvendit, Lindita Nikolla priti sot në një takim delegacionin e Partisë “Aleanca për shqiptarët” nga Maqedonia e Veriut, Arben Taravari, Kryetar i Partisë dhe Kryetar i Komunës së Gostivarit, Ilire Dauti, deputete, Isen Shabani, Kryetar i Komunës së Vrapcishtit. Nikolla ka vlerësuar rolin e faktorit shqiptar jo vetëm në forcimi e miqësisë mes dy vendeve por dhe për evropianizimin e Maqedonisë së Veriut.
”Shqiptarët, një faktor i rëndësishëm i zhvillimit, demokratizimit dhe evropianizimit dhe urë miqësie mes dy vendeve. Partitë shqiptare kanë një kontribut të rëndësishëm në përshpejtimin e integrimit në BE të Maqedonisë së Veriut. Rritja e përfaqësimit politik të shqiptarëve në vendin fqinj u shërben jo vetëm aspiratave dhe të ardhmes së tyre, por edhe zhvillimit dhe evropianizimit të Maqedonisë së Veriut”.
Nga ana e tyre, kryetari Arben Taravari dhe anëtarët e delegacionit vunë në dukje përparimin e arritur në përfaqësimin politik të shqiptarëve në Maqedoninë e Veriut, kontributin progresiv dhe konstruktiv të komunitetit të shqiptarëve dhe të forcave politike shqiptare në zhvillimin dhe nxitjen e mbështetjen e agjendës evropiane të vendit fqinj si edhe bashkëpunimit të ngushtë dhe marrëdhënieve miqësore me Shqipërinë.