Në vijim të vizitës zyrtare në Suedi, Kryetarja e Kuvendit, Lindita Nikolla, dhe Kryetarja e Zëvendëskryetarja e Komisionit të Ligjeve, deputetet Klotilda Bushka dhe Dhurata Çupi, u pritën sot nga Kryetari i Parlamentit të Suedisë, Andreas Norlén. Ishte i pranishëm edhe Ambasadori i Shqipërisë në Suedi, Virgjil Kule.
Kryetarja Nikolla vuri në dukje se marrëdhëniet e shkëlqyera mes dy vendeve po nxiten edhe nga intensifikimi i bashkëpunimit parlamentar.
“Ne mund ta avancojmë këtë bashkëpunim për shkëmbimin e përvojave dhe ndihmën gjatë procesit të negociatave me BE, duke nxitur gjithashtu bashkëpunimin mes grupeve të miqësisë, komisioneve, deputetëve dhe shërbimeve parlamentare”, tha Nikolla.
U diskutua për nxitjen e bashkëpunimit ekonomik, tregtar dhe në fusha të tjera me interes të dyanshëm mes dy vendeve, si infrastruktura, transporti detar, tekstilet, bujqësia etj. Reformat e ndërmarra nga Parlamenti dhe Qeveria e Shqipërisë, veçanërisht ato në fushën e drejtësisë, luftës kundër krimit të organizuar dhe korrupsionit, kanë pasur një ndikim të drejtpërdrejtë për krijimin e një klime të favorshme investimesh.
Në fokus të bisedimeve ishin edhe mbështetja e Suedisë ndaj Mocionit të Shqipërisë për një Rezolutë të re të AP të KiE mbi të ashtuquajturën Rezoluta Dick Marty e vitit 2011 dhe kërkesës së Kosovës për anëtarësim në KiE, mbështetje për të cilën Kryetarja Nikolla i shprehu mirënjohjen kolegut Norlén.