Janë tetë kryebashkiakë të Partisë Socialiste që nuk do të rikandidojnë në zgjedhjet lokale të 30 qershorit. Emrat ‘big’ janë padyshim ato të Vangjush Dakos dhe Qazim Sejdinit që sunduan Durrësin dhe Elbasanin për të paktën 12 vite.
Valbona Sako dhe Gledjan Llatja janë përzgjedhur nga Edi Rama si kandidatë për bashkitë e Durrësit dhe Elbasanit.
Florjana Koka nuk do të rikandidojë gjithashtu për bashkinë e Sarandës. Ajo u zgjodh në këtë detyrë në vitin 2015-të dhe sipas raportimeve të kohës, ishte ish-deputeti Koço Kokëdhima që e propozoi si kandidate të PS për qytetin bregdetar.
As Muharrem Rama nuk do të jetë pjesë e garës së 30 qershorit. Edhe Artur Bardhi, kryebashkiaku aktual i Kurbinit nuk do të garojë për një mandat të dytë. Të njëjtin fat kanë patur edhe Luljeta Dollani në Gramsh, Durim Rroshi në Memaliaj dhe Ardian Kokomani në Shijak.