Ministri i Brendshëm Sandër Lleshaj ka zhvilluar një analizë pune me autoritetet kyresore që operojnë në Portin e Durrësit, porti më i madh në vend me gati 40% të të ardhurave doganore.
“Porti i Durrësit është porta kryesore në Shqipëri. Prej këtu lëviz rreth 40% e volumit të mallrave. Po kështu, po kaq përqind e të ardhurave që gjenerohen në nivelin e doganave shqiptare, kryhet përmes këtij porti dhe besoj që dalim në përfundimin, që në qoftë se këtu kalojnë rreth 40% e të mirave dhe një përqindje e problemit po ashtu kalojnë përmes këtij Porti. Duhet të jemi fare të qartë që nevoja për përmirësim në Portin e Durrësit është e jashtëzakonshme”, tha Lleshaj.
Problemi kryesor i këtij porti sipas ministrit është fakti se duke qenë porti më i madh ka më shumë autoritete, si Autoriteti portual, policia e Shtetit, AKU, Dogana etj., dhe që e bëjnë kompleks menaxhimin e portit si një entitet të tërë.
“Nga nevoja, dhe detyra e Kryeministrit, është shtruar prej kohësh që Porti të arrijë në një nivel të lartë integrimi, që të funksionojë si një entitet i integruar, jo si disa entitete siç ka funksionuar prej shumë kohësh, por të funksionojë si një entitet i integruar, i cili funksionon, pra në bazë të një koncepti për një qëllim, me të njëjtat standarde, me të njëjta procedura, në mënyrë që të evitohen problemet e evidentuara në këtë Port, të cilat lidhen kryesisht me çështje që kanë të bëjnë me trafiqet, kontrabandën, me evazionin, por dhe me probleme që lidhen me sigurinë dhe nuk flas për sigurinë e brendshme të Portit, por me sigurinë e vendit”, tha Lleshaj.
Ministri shtoi se janë bërë disa sondazhe të vogla që sipas tij kanë provuar nevojën “për ndërhyrje të thella në drejtim të përmirësimit të standardeve të funksionimit të të gjitha institucioneve që funksionojnë në Port.