Lorenc Vangjeli ka folur mbrëmjen e sotme në një emision televiziv për zgjedhjen e deputetëve, ku deklaron se në Kuvendin e Shqipërisë, ka deputetë që kanë paguar para për të qenë pjesë e listave. Vangjeli tha se ka deputetë që kanë paguar edhe për të qenë në listën jo fituese, por me shpresë që mund të merrnin benefite në rast se PD do të vinte në pushtet.
“Nga 2017 deri në 2021 nuk kemi patur opozitë. Sot, nuk ka një alternativë opozitare për të ardhur në pushtet. Sot jemi dëshmitarë të ringjalljes së opozitës, por jo të shpresës së saj për të ardhur në pushtet.
Nëse do të kujtonim, deri në mars të 2013, pak kush mendonte se Berisha mund të binte. Por kishte një opozitë të uritur për pushtet, jo një opozitë për të vegjetuar.
Në PD janë dy grupe. Ka politikanë, ka nëpunës të emëruar, por edhe njerëz që kanë paguar për të qenë në atë listë. Kohezioni në grupin Basha-Alibeaj, vjen nga një element tjetër. Kohezioni i këtij grupi që mund të jetë bërthama e një partie të nesërme, hiq 4-5 vetë, që kanë të bëjnë me politikë, pjesa tjetër kanë paguar për të qenë në listë. Jo vetëm në listën fituese. Një pjesë kanë marrë para, qindra mijëra euro për të qenë në listë, jo vetëm në pjesën fituese, por edhe poshtë vijës, me shpresë se nëse do të vinin në pushtet të merrnin benefitet”, tha ndër të tjera Vangjeli.