Të katër luanët në kopshtin zoologjik të Barcelonës muajin e kaluar janë infektuar me koronavirusin e ri (COVID-19), konfirmuan këtë javë autoritetet e kopshtit zoologjik.
Ky është një shpërthim i rrallë i konfirmuar i koronavirusit në mes të felinave të mëdha. Shpërthimi i parë ndodhi në kopshtin zoologjik Bronx në muajin prill, kur pesë tigra dhe tre luanë dolën pozitiv ndaj virusit.
Një puma në Afrikën e Jugut dhe një tigër në një kopsht zoologjik në Tenesi po ashtu janë infektuar.
Ashtu si felinat e tjera, edhe luanët e Barcelonës shfaqën simptoma të lehta.
“Është si ftohje për ta”, tha drejtori i kopshtit zoologjik i Barcelonës, Juri Mauri, për televizionin lokal Beteve, duke shtuar se të gjithë luanët janë shëruar që nga ajo kohë.
Katër luanët nuk mendohet se kanë transmetuar virusin tek asnjë vizitor në kopshtin zoologjik.
“Për të marrë virusin, do të duhej të jeni në kontakt shumë të ngushtë (me luanët)”, tha Mauri.
Dy anëtarë të stafit në kopshtin zoologjik po ashtu dolën pozitiv ndaj virusit dhe autoritetet ende po përpiqen të zbulojnë burimin e infeksionit.
Asnjë infeksion tjetër nuk është zbuluar në kopshtin zoologjik.
Përderisa janë relativisht të pazakonta, infeksionet e koronavirusit në mbarë botën janë zbuluar edhe tek kafshët shtëpiake, tek macet dhe tek qentë. Sipas Klinikës Mayo, asnjë kafshë shtëpiake nuk është raportuar se ka ngordhur nga pandemia COVID-19.