Profesor i mjekësisë në Universitetin e Oksfordit John Bell, tha se kishte besim se deri në pranverë, do të kthehemi në normalitetin para pandemisë. Duke folur për BBC, ai tha se një vaksinë ka gjasa të jetë e disponueshme deri në fund të këtij viti.
“Jemi shumë afër. Vaksina është shumë e rëndësishme, sepse vërtet nuk ka asnjë mënyrë tjetër, për të fituar mbi këtë pandemi”, u shpreh Bell.
I pyetur nëse kjo do të thotë që jeta mund të kthehet në normalitet deri në pranverë, ai u përgjigj:
“Po. Po. Po. Unë jam ndoshta i parë që po e them, por do ta them me vetëbesim.”
Ai tha se ai ishte me të vërtetë i kënaqur me rezultatin e vaksinave. Kjo tregon, shtoi eksperti, se e kemi mundësinë ta krijojmë një vaksinë kundër kovid.
“Duhet të kujtojmë që ka shumë patogjenë ku ne jemi përpjekur për dekada dhe kurrë nuk kemi arritur të krijojmë një vaksinë. Si përshembull malaria, HIV, ka shumë sëmundje për të cilat nuk është krijuar një vaksinë, ndaj duhet të jemi të lumtur me këtë rezultat”, u shpreh eksperti.