Ministri i Jashtëm kinez Wang Yi zhvilloi të enjten bisedime telefonike me homologun e tij saudit Faisal bin Farhan Al-Saud, duke bërë thirrje për arritjen sa më parë të një armëpushimi, ndërsa konflikti i ShBA-së dhe Izraelit me Iranin vazhdon të përshkallëzohet dhe të destabilizojë Lindjen e Mesme.
Faisali e informoi Wang-un mbi zhvillimet e fundit, duke vënë në dukje se konflikti ka pasur pasoja me ndikim të gjerë si për rajonin, ashtu edhe për bashkësinë ndërkombëtare në tërësi.
Sipas tij, Arabia Saudite i jep rëndësi të madhe rolit të Kinës në çështjet globale dhe vlerëson partneritetin strategjik të nivelit të lartë midis të dy vendeve. Ai shprehu shpresën për të shtuar komunikimin e koordinimin me Kinën në platforma shumëpalëshe, të tilla si Kombet e Bashkuara, duke bërë përpjekje të përbashkëta për të ulur tensionet dhe për të përfunduar konfliktin.
Ndërsa kreu i diplomacisë kineze tha se Kina po e ndjek situatën nga afër me shqetësim të thellë dhe ka paraqitur bashkë me Pakistanin kohët e fundit një propozim prej pesë pikash për rikthimin e paqes dhe të qëndrueshmërisë në rajonin e Gjirit dhe në Lindjen e Mesme, që përfshin ndër të tjera respektin për sovranitetin dhe sigurinë e vendeve të rajonit, ndalimin e sulmeve ndaj civilëve e objektivave joushtarakë dhe mbrojtjen e rrugëve detare.
Ai shtoi se tensionet në Ngushticën e Hormuzit janë pasojë e përhapjes së konfliktit, duke paralajmëruar që vazhdimi i luftimeve do ta bëjë të vështirë sigurimin e qëndrueshmërisë në rrugët ujore jetike dhe duke vënë në dukje që përparësi e ngutshme tani është arritja e një armëpushimi sa më shpejt të jetë e mundur.
Wang theksoi gjithashtu se veprimet e Këshillit të Sigurimit të Kombeve të Bashkuara duhet të shmangin përshkallëzimin e mëtejshëm dhe nuk duhet të legjitimojë operacionet ushtarake të paautorizuara, çka mund të krijonte një precedent të rrezikshëm me pasoja serioze, veçanërisht për vendet e vogla dhe të mesme.