Presidenti rus Vladimir Putin deklaroi të enjten se Rusia është e gatshme të marrë pjesë në një raund të tretë bisedimesh me Ukrainën, që pritet të zhvillohet në Stamboll. Ai u shpreh se kontaktet mes delegacioneve të Moskës dhe Kievit janë “të vazhdueshme” dhe se diskutimet për datën e mbajtjes së raundit të ri janë në proces.
Putin sqaroi se në këtë raund do të shqyrtohen memorandumet e paraqitura nga të dy palët për një zgjidhje paqësore të konfliktit. Megjithatë, ai pranoi se këto dokumente ndodhen “në pole të kundërta”, duke lënë të nënkuptohet se ende ka një hendek të thellë mes qëndrimeve të Rusisë dhe Ukrainës.
Në të njëjtën kohë, lideri rus njoftoi se Rusia është e gatshme t’i dorëzojë Ukrainës trupat e 3.000 ushtarëve të tjerë të vrarë në luftë, përveç 6.000 trupave që janë kthyer më herët.
Putin deklaroi gjithashtu se një takim me presidentin amerikan Donald Trump është “i mundur”, por duhet të përgatitet mirë. Ai e përshkroi Trump-in si “një burrë trim” që “po përpiqet me sinqeritet për të zgjidhur çështjen e konfliktit” në Ukrainë.
“Ashtu si ai, edhe unë mendoj se këto takime duhen përgatitur mirë dhe duhet të prodhojnë rezultate konkrete në bashkëpunimin mes vendeve tona,” tha Putin.
Ai shtoi se marrëdhëniet mes Rusisë dhe SHBA-së po tregojnë shenja të një stabilizimi të lehtë falë qasjes së Trump-it, edhe pse shumë çështje diplomatike mbeten ende të pazgjidhura.
Në një konferencë për shtyp nga Minsku, Putin hodhi poshtë si “marrëzi” pretendimet se Rusia përbën një kërcënim për NATO-n. Ai tha se këto deklarata shërbejnë vetëm për të justifikuar rritjen e shpenzimeve ushtarake të vendeve anëtare të Aleancës.
Sipas tij, Rusia po planifikon të ulë shpenzimet për mbrojtjen, të cilat aktualisht arrijnë në 6,3 për qind të PBB-së, ose rreth 13,5 trilion rubla.
“Ndërkohë që vendet e NATO-s po planifikojnë t’i çojnë shpenzimet deri në 5 për qind të PBB-së, ne po mendojmë si t’i ulim ato gjatë tre viteve të ardhshme,” deklaroi Putin, duke shtuar se ende nuk ka një marrëveshje përfundimtare brenda qeverisë, por “të gjithë po mendojnë në këtë drejtim”.
Në një kohë kur lufta në Ukrainë vijon dhe dialogu diplomatik mbetet i brishtë, deklaratat e Putinit sinjalizojnë një mundësi për rifillimin e negociatave, ndërsa tonet e tij të moderuara ndaj SHBA-së dhe kritikat ndaj NATO-s përshkruajnë një strategji të dyfishtë të Moskës: presion ndaj Perëndimit dhe hapje për kanale të reja dialogu.