Presidenti i Venezuelës, Nicolas Maduro, e quajti sot fituesen e Çmimit Nobel për Paqen dhe udhëheqësen e opozitës, María Corina Machado, një “shtrigë djallëzore”, duke shtuar se ajo nuk mbështetet nga 90 për qind e popullsisë së vendit.
Në fjalimin e tij me rastin e Ditës së Rezistencës së Popujve Indigjenë, Maduro shmangu përmendjen e faktit që Machado fitoi Çmimin Nobel, raportoi “Mundo”. Sipas gazetës, televizioni dhe radioja shtetërore e Venezuelës censuruan mbulimin e çmimit Nobel për Machadon.
Në të njëjtën kohë, Maduro tha se është gati të përballet me “kërcënimet imperialiste”.
“Le ta dinë imperialistët se ne jemi populli i trashëgimtarëve të luftëtarëve të Karaibeve që gëlltisin zjarrin”, tha presidenti i Venezuelës.
Qeveria në Karakas ka frikë se SHBA-të së shpejti do të kalojnë në fazën e dytë të vendosjes së tyre ushtarake në rajonin e Karaibeve për të sulmuar objektiva tokësore të lidhura me kartelin e drogës Los Soles.
Uashingtoni pretendon se Maduro është në krye të një rrjeti trafikimi droge të përbërë nga gjeneralë dhe zyrtarë të lartë, si dhe guerilas kolumbianë, që thuhet se po e përmbyt SHBA-në me drogë.
“A mendoni se populli ynë ka frikë prej jush? A mendoni se populli ynë do të dorëzohet? Askush këtu nuk do të dorëzohet”, i tha Maduro opozitës, të cilën ai pretendon se mbështet ndërhyrjen ushtarake kundër Venezuelës.