Kandidati socialist për Bashkinë e Matit Agron Malaj është takuar me zgjedhësit e Ulzës, Prellit, Ferrë Karicës, Rukajve, Bruçit, Frankthit, Burrelit, etj. Deputetja e Qarkut Dibër Aurora Mara shprehu mbështetjen e saj për kryebashkiakun Agron Malaj dhe u kërkoi zgjedhësve matjanë të votojnë me 14 Maj për Malajn dhe për Partinë Socialiste.
“Agron Malaj ka punuar më shumë dhe më mirë se çdo kryetar bashkie në 30 vitet e fundit. Ndryshimet janë të prekshme dhe të dukshme në rrugë, ujësjellësa, shkolla, infrastrukturë, sport. Falë mbështetjes së qeverisë investime të tjera do të mundësohen në Mat”, tha Mara.
Agron Malaj ka falenderuar banorët e Matit për mbështetjen e dhënë gjatë katër viteve dhe pohoi se ai do të vazhdojë t’i trajtojë bashkëqytetarët si të barabartë, larg bindjeve politike.
“Unë do të vazhdoj të punoj me përkushtim deri në fund. Shumë investime duhet të ishin realizuar me kohë, por paraardhësit bënë pak ose aspak për këtë vend. Gjetëm një bashki të rrënuar në disa aspekte, ndërkohë ne kthyem modelin e punës, zhvillimit, progesit. Pas investimeve në energjinë elektrike, ujësjellësa, ujë vaditës, sfida jonë do të jetë asfaltimi i rrugëve të fshatrave. Vetëm muajin e fundit po asfaltojmë 26 km rrugë rurale”, nënvizoi Malaj.