Ministri i Financave, Petrit Malaj, deklaroi sot se qeveria është duke monitoruar tregun për të vëzhguar lëvizjet e çmimeve dhe do të ndërhyjë nëse do të jetë e nevojshme, duke mbështetur shtresat më vulnerabël, si pensionistët dhe familjet që përfitojnë ndihmë ekonomike, në rast të rritjes së çmimeve.
Gjatë konferencës për mediet mbi ecurinë fiskale të tremujorit të parë të vitit, Malaj theksoi se mbështetja për këto kategori është edhe një sugjerim i ardhur nga partnerët ndërkombëtarë financiarë si Banka Botërore (BB) dhe Fondi Monetar Ndërkombëtar (FMN).
Ministri u ndal dhe te raporti i ditës së djeshme i Bankës Botërore, i cili uli parashikimet për rritjen ekonomike të Shqipërisë për këtë vit, ku bëri të ditur se ky rishikim është i justifikuar në kushtet e pasigurive që po sjell konflikti në Lindjen e Mesme.
“Rishikimi i parashikimeve për rritjen ekonomike është i drejtë, pasi situata është dinamike dhe është e lidhur ngushtë me zhvillimet në Lindjen e Mesme. Po monitorojmë situatën dhe do të reagojmë nëse do të kemi ndryshime në çmime. Reagimet e qeverisë do të jenë të orientuara drejt mbrojtjes së grupeve më të cenueshme, si pensionistët. Çdo masë që do të ndërmarrim për përmirësimin e situatës do të jetë e koordinuar me partnerët tanë ndërkombëtarë, të cilët na japin këshilla të vlefshme”, tha Malaj.