Ish-ministri i Drejtësisë, avokati Ylli Manjani, ka reaguar me një postim në rrjetet sociale ku komenton një vendim të fundit nga gjykata malazeze lidhur me përdorimin e të dhënave nga përgjimet e enkriptuara të Sky ECC.
Lexo edhe :
Related Posts
Manjani thekson se krahas këtij vendimi nga Mali i Zi, janë edhe 6 vendime të tjera që ai dhe kolegët e tij avokatë kanë dorëzuar në SPAK dhe gjykatat shqiptare, duke ngritur dyshime mbi mënyrën e përdorimit të këtyre të dhënave në proceset gjyqësore.
“Krahas 6 të tjerëve që ne si avokatë i kemi dorëzuar SPAK dhe Gjykatave tona, për (mos) përdorimin gjyqsor kuturu të të dhënave të përftuara nga përgjimet e encriptuara të Sky ECC dhe jo vetëm.
Gjykata Malazeze i paska thënë prokurorisë atje, merrini këto të dhëna, futini në një zarf, zijini dhe pijuni lëngun. Në gjykatë nuk shkohet me hamendësime të krijuara nga përgjime.
Kudo ku gjykata funksionon mbi palët, përfshi edhe prokurorinë, bëhet drejtësi. Nuk ka drejtësi përgjime, aq më tepër me hamendësime të krijuara mbi to, o njerëz!
Kot, për muhabet, meqë na thanë se nuk u kemi çuar asnjë vendim nga bota për këtë punë..”, shkruan Manjani.
Sipas tij, drejtësia nuk mund të mbështetet tek përgjimet e interpretuara pa një bazë të qartë ligjore dhe të verifikueshme. “Kudo ku gjykata funksionon mbi palët, përfshi edhe prokurorinë, bëhet drejtësi,” shton ai, duke kritikuar përdorimin e hamendësimeve si baza për veprime gjyqësore.
Postimi i Manjanit vjen pas debateve të shumta në lidhje me legjitimitetin e përdorimit të të dhënave të përftuara nga përgjimet e koduara si Sky ECC në proceset penale, një çështje që vazhdon të shkaktojë polemika si në Shqipëri ashtu edhe në vende të tjera.